TVB又爆躁底導演 毛姐:睇到好肉赤

TVB又爆躁底導演 毛姐:睇到好肉赤

By:

星期二, 十月 15th, 2013

噚晚集《最佳女主角》繼續係黎芷珊訪問毛舜筠(毛姐),毛姐向來愛提攜後輩,對後輩愛護有加,多加提點,毛姐話:「應該係咁做,因為娛樂圈條路好難行,佢哋好多嘢摸索,咁我將自己嘅心得同經驗話畀佢哋知,等佢哋唔使行得咁辛苦,當然吸收幾多就因人而異。」

2008年,毛姐有份主演無綫處境劇《畢打自己人》,當時佢對陳茵媺及鄭欣宜特別疼錫,覺得佢兩個演出用心,不過毛姐喺節目內,就踢爆該劇導演性格躁底,令拍攝氣氛唔好,毛姐話唔鍾意呢位導演喺拍攝現場用咪高峰大聲講嘢,佢認為事前可以同演員講清楚點拍,或者叫場務幫手睇位,咁大家就可以喺安靜環境下拍劇,但毛姐無奈咁話呢位導演好火爆,控制唔好情緒,咁樣唔係幾好。

毛姐憶述有場戲,當日佢冇份拍,只係欣宜及茵媺對手戲,但毛姐都早少少返去睇佢哋演出,劇情講述兩女憶述身世時,不禁悲從中來爆喊,兩人演得好投入,感情真摯,點知呢個時候,導演竟然用咪高峰嗌Cut,仲話「再嚟過,唔好問」,而說話當中仲夾雜粗口,當堂搞到茵媺及欣宜好緊張;再次roll機拍攝後,呢位導演又突然用咪高峰大嗌cut,此時毛姐看在眼裡,都戥兩女難過,佢好肉赤,因為演緊感情戲中途突然煞停,是為大忌也﹗不過毛姐唔想插手件事,佢話喺攝影棚內,導演始終大晒,好彩欣宜及茵媺演得好好,仲大讚兩人醒目,好值得疼錫添。

之後毛姐就同嗰位導演去一個安靜地方傾下,毛姐勸佢唔好再用咪高峰鬧演員。除咗讚賞欣宜及茵媺外,毛姐亦對薛凱琪(Fiona)讚不絕口,兩人喺《早熟》合作過,毛姐話Fiona喺戲中畀到好多感覺佢,而Fiona亦錄咗條片,感謝毛姐用自己經驗教識佢好多嘢。

comments