Sammi欣賞安仔:「你冇記我唔好,你只係記得我畀你嘅快樂」

Sammi欣賞安仔:「你冇記我唔好,你只係記得我畀你嘅快樂」

By:

星期五, 十月 4th, 2013

鄭秀文(Sammi)喺今集《最佳女主角》中,除咗談及2005年拍《長恨歌》時嘅「黑暗時期」,仲有就係Sammi同男友許志安細水長流愛情故事。

主持黎芷珊問Sammi當初點解同安仔分手,佢解釋當時大家去到一個階段,雙方未結婚,又好似唔會結婚,當時冇乜計劃,自己亦冇諗過咁早結婚,當年仲係20幾,梗係事業為先,Sammi笑言:「阻住我嘅嘢通通都要死。(佢阻住你?)唔係,我冇要佢死。」Sammi又話兩人拍拖十年,已去到一個樽頸位,覺得抖唔到氣,結果自然分開咗。

Sammi及安仔分開超過近十年先復合,芷珊問佢期間有冇人追求佢?Sammi哈哈笑兩聲,再巧妙反問:「不如問我有冇追人?」佢坦承都想嘗試其他relationship,但最後都唔work。咁佢會揀乜嘢類型男仔?「冇諗乜嘢類型,真係冇乜,有啲有感覺就食餐飯,唔得嘅就拜拜。(點樣唔得?)溝通唔到,有啲人永遠做到好好朋友,但要再踏一步成為伴侶或丈夫就唔係好得。」

芷珊再問乜嘢原因令佢同安仔復合?Sammi話:「我諗個Timing,反而多謝寫咗公開信後,我好坦然自己感受,真係有諗過喺埋一齊,但咁多年冇啱timing,冇去實行。咁之後佢冇拍拖﹑我又單身,一把年紀咯,咪試下囉。」芷珊又問:「佢睇咗封信知你內心點諗?佢先夠膽(復合)?」Sammi:「互相夠膽﹗」

復合後兩人有冇任何計劃?Sammi話:「冇乜大plan,其實好開心會珍惜依家相處,同埋學緊點相處,尤其是係我,之前話拍咗十年,但嗰時冇好花心機愛護及理解呢個人,依家再喺埋一齊,好似我好多嘢第一次認識呢個人,原來佢有啲個性係咁,以前瞎眼睇唔到。原來我以前太專注工作同太自我,依家覺得係真正相處,真正一齊,呢個關係先係相等付出。」

Sammi以前脾氣超大,當然安仔亦受唔少,絕對會向安仔大發脾氣,Sammi話:「我欣賞佢一樣嘢,成日睇好嘅嘢,佢(安仔)話:『咁你又唔知我同你一齊幾快樂嘅啫』,咁我又覺得好感動,你冇記我唔好,你只係記得我畀你嘅快樂,我喺佢身上學識,互相學習好重要。爸爸同我講,婚姻裡面唔係單純愛,要不停欣賞對方,要學識欣賞伴侶。」哇﹗真係好感動呀﹗

Sammi直言現時多咗相處時間及真正溝通,佢話:「以前有我講冇佢講,我發脾氣佢就吞晒我啲脾氣。依家我哋相處舒服,而且識得付出,就算拍拖佢都要佢自己世界。」

芷珊再問:「上帝plan你哋幾時結婚呢?」Sammi話:「唔知呀,等囉,唔係冇機會。(未聽到聲音?)冇一個時間約束,絕對有可能,由抗拒結婚,到依家唔抗拒結婚,雖然未有時間性,但裡面好大改變,我要感謝上帝,將我婚姻大事放喺禱告入面。」
若然結婚會否通知大家?Sammi話:「唔會通知大家,我諗結咗先通知大家,一早通知就好大件事,我理想中(婚禮)越簡單越好。」

想唔想要小朋友?Sammi話:「如果真係畀我揀,我反而麻麻哋(要小朋友),因為我唔覺得我會好識養好識湊。」Sammi又話將來想做全職義工。

comments