G.E.M. 以廣東話受訪 一時拆咪牌一時又唔拆

G.E.M. 以廣東話受訪 一時拆咪牌一時又唔拆

By:

星期一, 十月 7th, 2013


歌手同TVB有歌手合約在身,接受其他電視平台訪問嗰時要用國語,似乎個個歌手都話係跟大隊,大家咁做我咪咁做,而年紀細細一向敢言嘅鄧紫棋(G.E.M.),初時都係跟大隊用國語接受其他電視台訪問,直至兩年前同TVB傾續約時,佢公司加入條款話要用返廣東話接受其他電視台訪問,呢兩年都冇問題發生,咁若果TVB冇明文規定,又點解大家無啦啦走去用國語做其他電視台訪問呢?真係想搵機會練普通話咩,咁點解又要簽約加條款講明可以講廣東話呢?

G.E.M.今日喺觀塘擔任跳舞評判接受電視台訪問時,起初佢助手要求NOW電視拆走咪牌,不過有線娛樂台就唔駛拆,G.E.M.同所有電視台全程用廣東話做完訪問後,再問佢點解部份要拆咪牌,佢就話:「平時負責開同事今日唔喺度,所以都唔係好清楚,以我記憶就間間都唔駛拆。」

最後G.E.M.再接受多次NOW電視有咪牌嘅訪問。G.E.M.話話:「初時我都係跟大隊用國語,之後覺得怪怪哋,續約時咪傾要用廣東話做其他電視台,呢兩年都係咁,我都有上到TVB幾個大騷,冇咩影響。」

對於男朋友林宥嘉嚟香港,問G.E.M.係咪要約會下?佢就話:「我成個禮拜唔喺香港,要返屋企陪媽咪食飯,至於媽咪有冇見過佢,你哋問我媽咪,我呢排頭昏腦漲失憶。」

comments