DaDa乳模師妹借《夜蒲3》抽水 錢國偉暗寸施念慈唔識教女

DaDa乳模師妹借《夜蒲3》抽水 錢國偉暗寸施念慈唔識教女

By:

星期六, 十一月 9th, 2013

由錢國偉執導嘅《喜愛夜蒲》系列,2011年開拍第1集,電影起用大量女演員,是非不斷。好正常,有囡囡嘅地方,是非一定多,仲要係咁多囡囡添。單係數《夜蒲3》,先有一單DaDa盛傳出席開鏡儀式時,嫌棄師妹蕭美卡(Mika),翌日仲突然宣佈息影,火速潛水,激到錢導生蝦咁跳,馬上易角再寫劇本,日拍夜拍chur到盡,希望趕及聖誕檔上映。聖誕咁多假期,審批部門都要放假0架嘛,《夜蒲3》又容易「踩界」,改多兩臣審多幾審,好容易超時趕唔切。

本來錢導已經嬲爆0架喇,仲要嚟兩個唔知乜頭乜路嘅露暈女,以《夜蒲3》女主角名義到內地掘金。實情係兩女去過試鏡,不為錢導所用,但兩女仍以《夜蒲3》女主角之名喺內地掘金,因而與錢國偉爆罵戰。最搞笑仲係呢兩位露暈女仲要寸番錢導轉頭:「請不要拿AD2嚟做你部電影嘅宣傳工具!酒吧點宣傳係酒吧嘅事,你問番內地酒吧啦!錢導演!?」

估唔到《夜蒲3》上映在即,又爆出有囡囡借用女主角之名搵食,但今次錢導開火對象唔係嗰個囡囡——曾善美(Mei Mei),而係佢嘅經理人施念慈。一講到呢度,大家是否有點眉目?

事緣有人喺微博貼圖,同錢導講,呢個曾善美借《夜蒲3》主角之名行走江湖,仲四出托人引薦搭路出騷,錢導即留言謂:「我答你吧!曾善美不是女主角,她也只是客串過幾秒鏡頭而已!不要誤信!她跟其他冒充女主角的女模一樣!欺騙觀眾! 」雨僑亦不禁冷笑回應:「比我們四個更多登台活動,哈哈!」出名好火嘅監製伍健雄就謂:「不知害羞!」整咗個憤怒表情。

件事未完,之後錢導再於微博寫道:「為何是在香港經理人施念慈期下的藝人,也會做我們一直討厭的事,欺騙觀眾虛假事實,是當內地觀眾好騙!」明辣施念慈。

咁錢導係咪因為DaDa潛水而嬲施念慈?只係中咗一半。事關DaDa早前放風復出(開記招前),錢導已經幾勞氣咁話:「我對DaDa冇乜感覺,反而覺得施念慈誠信有問題,前兩日佢先同我講,話俾人屈(DaDa復出),如果DaDa真係返嚟都雪佢幾年,0依家睇落唔多似,原來成件事都係一場戲啫。」

咦咦咦,之前有傳聞話,同屬施念慈旗下嘅Mika,因為DaDa粒聲唔出潛水辭演,令其於《夜蒲3》戲份亦遭大減。依家施念慈另一囡囡又爆單咁嘅嘢,錢導會否暫停錄用施念慈藝人0架?

comments