31歲靚靚港姐曹敏莉誕男嬰

31歲靚靚港姐曹敏莉誕男嬰

By:

星期五, 九月 27th, 2013

最近娛樂圈喜事重重,日前陳浩民B仔出世,噚日蔡少芬同曹永廉都分別榮昇老闆級,今日,輪到靚靚港姐曹敏莉生B喇。下午五點左右,曹敏莉喺微博貼圖寫道:「細佬出世了!多多第一句就興奮地講,『I see Marco啦!』作為媽媽,聽到心都甜晒。好多謝大家的祝福。我相信他們兩姊弟一定會有很多愛陪着長大!」

靚媽仲貼咗兩張BB相,其中一張係曹敏莉攬住兩歲囡囡、左手抱住BB影嘅;另一張係BB大頭,眼仔都未開,瞓得好冧好舒服呀。

31歲嘅曹敏莉2010年10月同金融才俊張家傑(Jacky)結婚,馬上造人,誕下囡囡張逸晴(Dora)。早前曹敏莉陀B嗰陣,曾透露陀呢胎特別辛苦,嘔足3個幾月,仲一早改定英文名叫Marco。依家湊成一個「好」字,未知會否再追呢?

comments