0靚模狂掃HKTV股 變蟹賴王維基

0靚模狂掃HKTV股 變蟹賴王維基

By:

星期六, 十月 19th, 2013


近日王維基嘅香港電視不獲政府發牌,好多市民都有唔少意見,有人要求政府公佈唔發牌嘅原因,有人將王維基封神封聖當佢係民主鬥士(但佢已講明自己係生意人),亦有部份人好支持王生、叫佢繼續做……原因有一籃子,但係,有一個更加現實嘅原因,係為咗:錢。

一直被視為最有機會獲發牌照嘅香港電視(1137)。10月15日下午,當傳出政府會公布增發免費電視牌消息,香港電視同有線寬頻(1097)股價勁升,香港電視升幅一度高達36%,創今年新高,全日升幅達28%,成交逾3億。發牌結果公佈後,唔使講……

唔少人就好似趙哲妤咁,15號當日下午一聽到傳出發牌消息,即刻用五位數字買1137,依家,變蟹貨喇,佢噚晚就走出嚟,話想快啲有個牌,等股票可以升番!

趙哲妤噚晚出席綠魔24歲生日派對,佢都講得好坦白:「我自己本來就冇乜所謂嘅,但係因為之前一日我入咗好多香港電視嘅股票,掃貨,因為佢升得好快,點知第二日跌咗好多,咁就即刻大損手,好唔開心,所以希望即刻發牌,等我啲貨唔使變蟹貨,惟有0依家接多幾個job啦,做得辛苦啲。」

問趙小姐溝貨會否溝番啲1097落去,佢話有線隻股佢都有買:「升咗,都唔夠嗰隻(1137)跌得咁犀利。」趙哲妤仲話,因為之前香港電視個聲勢好勁,令佢以為一定中梗,於是瞓身。好喇,依家輸咗喇,佢就話:「俾佢啲聲勢呃咗!」輸打贏要,咪呢啲囉。

出現喺綠魔,許嘉浩嘅生日派對入面都有講到發牌事件,佢就話都希望可以快發牌畀香港電視。

comments