馬明BB北上拍戲畀女圍 陳勳奇女兒嗒晒糖

馬明BB北上拍戲畀女圍 陳勳奇女兒嗒晒糖

By:

星期二, 十月 22nd, 2013

近期好似少見馬國明蒲頭,原來馬明近日北上開戲,呢部電影由成龍監製﹑陳勳奇導演嘅《緣來是遊戲》,馬明喺戲中飾演風流律師。

有指成龍欣賞馬明喺《衝上雲霄II》演嘅風流機師,所以開價三百萬片酬邀佢拍戲,仲出任「男二」(「男一」係孫堅),而成龍亦曾探班,陳導演亦親教馬明演戲,照顧周到。

「TVB筍盤」馬明喺香港甚有觀眾緣,而佢主演嘅《On Call 36小時II》快將播映,馬明將憑此劇挑戰台慶頒獎禮視帝。除咗喺香港受歡迎外,馬明喺內地同樣受歡迎,今日有報道指佢喺無錫拍新戲時,就即刻畀女圍,事關劇中幾位女角爭住向馬明「抄牌」,同馬明合照時仲胸壓對方。

其中一位名叫「雨書」嘅女藝人,對馬明非常熱情,戲中佢哋有唔少對手戲,明顯對馬明嗒糖,經常挨身挨勢同馬明合照,而雨書仲主動出擊,邀約馬明食飯撐枱腳云云…………

咁其實呢位「雨書」係邊位呢?簡單介紹一下,雨書係陳勳奇導演女兒,之前叫陳杏妍,後改名陳開心,同杜德偉傳過緋聞,0依家再改名叫雨書,而該報道話陳導演冇向馬明特別介紹,所以馬明唔知呢位同佢合作女藝人,就係陳導演個女。(當然0依家可能知道咗。)

除咗雨書外,報道又話其他女角牛麗燕﹑西安出生嘅林苑(唔係側田舊愛)等,都對馬明流晒口水,亦爭相約佢食飯,不過都畀馬明婉拒,寧願搵孫堅陪食,或者叫room service,報道引述馬明回應,佢話0依家同劇組相處融洽,不過自己係搏殺期,其他嘢唔諗住喎﹗

comments