陳茵媺突肚返港 陳豪接機「紅都面哂」

陳茵媺突肚返港 陳豪接機「紅都面哂」

By:

星期六, 九月 28th, 2013

一直留喺多倫多養胎嘅陳茵媺,今朝5點幾,終於返嚟香港同大家見面喇!
自7月喺加拿大擺喜酒之後,同老公陳豪分隔兩地兩個月嘅佢,戴住勁閃嘅鑽石戒指,手鍊同耳環,一個幸福貴婦look出閘,Aimee爸爸亦都陪住寶貝女一齊返港。

老公陳豪雖然雙眼爆哂紅筋,不過仍然難掩興奮,一見到Aimee仲即刻摸吓肚仔,仲拖住老婆手,一齊面對一早喺機場等佢哋嘅50位記者朋友。

由神秘請假喺歐洲結婚,到返加拿大養胎擺喜酒都冇乜發言嘅佢哋,喺機場終於講多咗少少嘢喇,但係對BB嘅性別、預產期,甚至英文名等等就仍然封口,只係話要睇醫生後先再公佈,但係Aimee就話陳豪一定會入產房陪產囉!

準老竇陳豪繼續係開心到面紅紅,佢話問准醫生後會親手剪臍帶,記者問佢怕唔怕見到血淋淋場面,佢就幽默咁話自己扮演過好多次醫生喎。

comments