鍾嘉欣BB出浴照流出 好白滑

鍾嘉欣BB出浴照流出 好白滑

By:

星期三, 十月 2nd, 2013


成日講來講去都係《神鎗狙擊》,令八點半檔嘅《巨輪》好似備受冷落,咁依家就講吓啦……因為有鍾嘉欣BB出浴鏡頭嘛,都幾激罕0架。

今集《巨輪》係講鍾嘉欣俾人脅持,幸好有陳展鵬英雄救美,仲係命懸一線嗰隻。講鍾嘉欣成個人失足飛咗落街,千鈞一髮之際抓住分體式冷氣個架,點知個架承托唔到BB嘅重量,螺絲飛脫,得番一邊條條揈。幸好陳展鵬情急智生,用消防喉綁住自己條腰當游繩,但又係嗰啲啦,最後兩人雙雙墮樓,跌落去嗰陣,忽然間又無厘頭有架放滿床褥嘅貨車泊咗喺樓下,兩人齊齊跌咗落去,唔死得。

跟手其中一個賊仔又唔知點解,搶咗架貨車開車逃走,令車上嘅陳展鵬同鍾嘉欣一仆一碌。危急關頭,陳展鵬又係時候展示佢嘅非凡身手,擒出去破車窗再跳入車中與持槍賊人惡鬥一番。最後自是邪不能勝正。TVB方程式去到呢個位,一定係撞車,而撞之前又一定無啦啦前面有一堆膠筒或鐵筒,卸咗嗰度衝力,然後一定又係炒埋去時水花四濺,再跟住就係男方臨危救出車廂中的弱女,而剛跳出嗰下,架車就一定爆炸。

由情急智生用消防喉當游繩、樓下神差鬼使一早stand by的貨車、車上用來卸墮樓衝力的床褥、路上忽然彈出的膠筒同鐵筒,以及一逃離車廂就「嘭」一聲發生大爆炸——無數表面上的巧合,都是TVB劇集常見方程式。穿崩位好明顯,包括鍾嘉欣墮樓時的大特寫,工廠大廈外牆忽然變成「平面」,而陳展鵬隻手表,亦出賣咗拍攝時間……伸手嗰下仲係五點,點知下一秒拉實鍾嘉欣隻手嗰陣,已經五點十分。仲有就係,炒車嗰度,明明係啟德機場,點解個機場唔見咗嘅?

幸好,幸好最後,都有嘉欣BB洗白白甜絲絲想念陳展鵬嘅場面,否則只怕觀眾要鬧爆了。但你又咪話喎,日前嘉欣BB拍《飛虎II》嗰陣,又係俾馬德鍾抱起逃跑,一跑就發生大爆炸——今集《巨輪》一模一樣,又係男方一抱起嘉欣,後面就發生大爆炸。劇中嘉欣BB傷手,現實中嘉欣BB都係傷手入急症室。

順帶一提,徐子珊喺《神鎗》裡面,又係一到場就發生爆炸,子珊成個彈起;鍾嘉欣就係一俾人抱就爆炸……救命。幾時發牌?

comments