鍾一憲同歌迷「結婚」

鍾一憲同歌迷「結婚」

By:

星期二, 十月 15th, 2013


為預祝鍾一憲(Jason)25歲生日以及「鍾一憲國際後援會」正式成立,日前Jason與百名Fans舉行派對聚會。席上Jason同粉絲玩遊戲﹑唱歌以及真情對話,期間大家都感觸落淚,Jason話:「入行三年,得到好多Fans支持,大家經歷過好多開心和難忘時劇。同歌迷一齊成長,有人加入亦有人離開,好多回憶!」講到呢度Jason不禁流下男兒淚,台下有Fans一邊喊,但又一邊叫Jason唔好喊,場面既感人又搞笑。

而Jason亦抽出一位幸運女歌迷,完成佢嘅心願,兩人喺百人見証下舉行「婚禮」,雖然只係玩遊戲,但Jason絕不馬虎,除咗揭頭紗,同「新娘」十指緊扣外,交換戒指時更高呼「我願意」。當場更有人大喊新娘為「鍾一嫂」,引起全場大笑。之後Jason又同歌迷合唱,佢抽獎送出貼身禮物時掀起高潮。

往後日子,Jason要到韓國發展,Fans特別練習咗一首生日歌預祝佢生日,令佢驚喜萬分。Jason話:「生日願望希望大家都健康和開心,稍後我會到韓國發展,希望有更多不同國籍的歌迷加入後援會,舉行各式活動畀大家互相交流。」

comments