鄭俊弘失準險出局 陳明恩成為「高分后」

鄭俊弘失準險出局 陳明恩成為「高分后」

By:

星期一, 十月 7th, 2013

今集《星夢傳奇》只得星級評判周啟生﹑巫啟賢﹑葉蒨文(Sally)及郭偉亮,以及一眾參賽者,因為錄影當晚適逢掛八號風,所以冇招待現場觀眾。

陳明恩越戰越勇,表現出色,佢邊跳邊唱鄭秀文《信者得愛》,獲得平均高分88分,當中Sally仲畀佢93分,大讚明恩表現出信心,而巫Sir亦讚佢人歌合一添,不過周啟生就認為明恩邊跳邊唱時,出現走音情況,此時巫sir就加把嘴,話冇一個人邊跳邊唱係唔走音嘅,除咗韓國團隊,因為佢哋咪嘴,而周啟生就寸返巫Sir:「係咪你自己唔得咋﹗」兩人唇槍舌劍,有啲火藥味啵﹗

反而高分王鄭俊弘(Fred)今集「出事」,仲差少少出局添,Fred選唱張學友《我應該》時,表現稍為失準,作為師傅嘅巫Sir狠批佢音準有問題:「我最開心見到乜?就係Fred有好多對手,今日你(Fred)唱得比較唔好,好奇怪,第一個音出現問題,如果能成功晉級,真係要好好練習音準。」

至於Sally亦覺得Fred壓力好大,仲只係畀佢82分,Sally話:「呢首歌唔難唱,唔知點解走音?」Eric亦認為Fred有啲鼻音,高音部份冇以前突出,今次做唔到人歌合一,最後Fred以84.7分打入最後五強,然而晉級過程就相當驚險。

而羅鈞滿唱《如果我有事》時,Sally坦言對佢要求同樣高,覺得佢把聲太似張學友,同埋唔夠集中;巫Sir就認為佢選歌好好,但方向錯咗,心裡面冇目標,所以要佢檢討;反而周啟生就讚羅鈞滿表現誠懇,兼且唔造作。

而陳明恩今晚為「高分后」,鄭世豪第二,獲87.5分,羅鈞滿﹑Fred及姚兵就分列三至五位,佢哋成功入圍最後五強,而陳倩揚及葉暐被淘汰出局。

comments