視后失手露「缽仔糕」 佘詩曼激動話要「打格」

視后失手露「缽仔糕」 佘詩曼激動話要「打格」

By:

星期四, 十月 10th, 2013


無綫視帝陳豪同視后佘詩曼,今日去到銅鑼灣幫一間手錶品牌新店,主持剪綵儀式。兩個人分別收到兩萬幾及八萬幾蚊嘅手錶。

而阿佘換咗另一套白色露肩裙出席發佈會,佢喺台上俯身啟動儀式時,因為條珠珠裙實在太重喇,一個唔小心令阿佘露出缽仔糕同膠紙,首次老貓燒鬚嘅阿佘,事後激動咁講笑話:「Oh no!唔好打破我打底王個美譽,用星星、心心同格仔遮住啦!」準爸爸嘅陳豪就透露話未幫個仔改名,仲好老實咁講:「都想追個女,好多家長係咁!」

另外,阿佘明年一月拍新劇《使徒行者》,但未能同梁家輝合作感到可惜,對於有份拍嘅林峯,就話好期待同佢合作,阿佘講笑話:「係呀?佢成日扮唔開心,我又唔係BB。我同阿峯係好朋友,好耐冇見,都期待合作。」

對於今年無綫視帝、視后將會加入專業評審團,阿佘就話:「唔關我事,我今年冇劇出。」會唔會覺唔公平?佢老實話:「只要做得好就贏!」

今年有份角逐視帝嘅陳豪,就認為去年全民投票,提升參與度係好事:「上年仲有嘉許幕後,增加士氣,公眾投票互動更好。」

comments