綠葉點生活? 「一騷約」每月千幾蚊 冇工開就$0

綠葉點生活? 「一騷約」每月千幾蚊 冇工開就$0

By:

星期六, 十月 26th, 2013



除咗朱婉儀外,有份上《娛樂審死官》大爆無綫如何「善待」員工嘅,仲有同屬港姐出身嘅關伊彤。2002年參選港姐,打入12強。佢比朱婉儀「幸運」一點,因為維基有佢嘅條目;但佢同無綫好多寂寂無聞一樣,接受嘅,係令人頗難堪的待遇。

關伊彤表示,佢係拎埋十年金牌先至走。點解走?因為份約。份約有乜嘢問題?關伊彤話:「TVB有好多種唔同嘅約,我嗰時係一騷約,即係你有工開,就等於有糧出。(一個騷幾錢?)千幾蚊啦。」眾前無綫藝員即大呼:「嘩千幾蚊,好多喇你。你真係好好彩,俾千幾蚊你。」關伊彤都話自己好好彩,因為係港姐出身,自己真係愛上做戲,亦都撐咗五年,但真係撐唔落去:「其實係真係生活唔到,因為……其實你見到……自己有時會覺得……自己咁大個女……」講到呢度,關伊彤已經哭了。

關伊彤續說:「自己咁大個女,我都未仲可以養到我屋企,仲要屋企人支持番我轉頭,我會覺得自己好冇用。呢幾年我係咁裝備自己,你裝備你做得好,我出面好多朋友同我講,你啲戲OK0架,我哋支持你鍾意你,但我唔可以同人講你冇騷就冇錢0架…我一定要有嘢做,先至有糧出。」

直至過檔香港電視,關伊彤謂,佢終於有收入,而且,佢已經組成家庭,亦有小朋友:「我冇奢望自己被捧上一線…女仔係唔襟擺0架,我今年三十歲,我唔介意升級做媽咪,我唔介意做其他角色,主角一定唔係我哋,一定有其他廿零歲0靚妹去做,我惟有自己求進步。呢邊有角色俾我casting,我試過好多次,中唔中都好,我已經盡咗我努力,總會有一日大家會欣賞到我。」

猶記得噚晚梁乃鵬先至話,因為受到廖啟智一篇訪問啟發,令佢決定要開始培育TVB大家庭的文化,管理層要令同事感覺到係家庭成員嘅一分子,列出四大重點:
1.首先要令藝員受到尊重
2.要有合理工作時間
3.薪酬要合理
4.要有足夠演出機會
從相反方向去諗,是否暗示依家呢4點都……做唔好?或做唔到?

comments