細細粒被抱起腿張開 咪咪姐彈Bra帶啪啪聲

細細粒被抱起腿張開 咪咪姐彈Bra帶啪啪聲

By:

星期二, 十月 22nd, 2013

演藝人協會會長曾志偉,因為對港視未獲發牌遲遲冇表態俾人狂批,噚晚演協已經發咗聲明,志偉就喺電視城錄影無綫嘅《超級無敵獎門人終極篇》,不過佢就冇做訪問,但錄影時亦有攞發牌事件講下笑搞gag。

主持之一錢嘉樂因為出席首映冇錄影,林曉峰笑話:「嘉樂去攞個咩最受歡迎長老獎,有幾個結果,第一係嘉樂,第二係我,第三係祥仔,第四係其他。」志偉即講笑:「你哋黑箱作業呀。」

噚晚係《老表,你好嘢!》隊對《On Call36小時II》隊,《老》演員王祖藍、王菀之、古明華等抬住「細細粒」陳嘉佳出場,搞到細細粒腿張開,不過見鬼妹陳明恩同古佬好吃力相當辛苦,最後當然跌晒落地啦。而《On》嘅藝員就叫口號:「收視唔夠36點好易畀人隊。」玩「紅綠燈」時《老》演員狂講有味笑話及擺古怪甫士,Bob瞓地扮仆街,林曉峰笑佢:「你成個韓星仆正恩咁樣。」朱咪咪扮賣胸圍廣告,佢唔怕醜自拉bra帶彈到啪啪聲,搞到觀眾係咁笑。

吳啟華嚟緊要返內蒙拍劇,未必有時間返港為《On》劇宣傳,不過講到隨時有份喺無綫頒獎禮角逐視帝,吳啟華話:「唔關我事,就算畀獎我都未必有時間返嚟。」明年吳啟華會再為無綫拍劇,不過佢透露都有其他人搵佢合作拍劇,記者笑話只有佢先可以食幾家茶禮:「如果啱就可以合作,不過如果真係好介意嘅話,我都以TVB行先,TVB就好似我母校咁。」

comments