秋生:香港唔需要新香港人

秋生:香港唔需要新香港人

By:

星期日, 十月 27th, 2013


黃秋生又於節目中講到依家社會上的「情緒化回應」,佢話:「好多人講吓講吓,就會唔知講咗去邊。當大家都…或者有一日香港地震,大家都會話係梁振英搞出嚟,大家會覺得,哈哈,你話香港聽日地震喇,啲人就話『最衰梁振英』,咁跟住就有人出嚟講,因為冇普選。有普選冇地震呀。你睇吓睇吓,覺得好荒謬。唔係話呢一個人嘅處理方法對唔對,或者普選應唔應該有,而係當個情緒去到乜嘢都拎呢樣嘢出嚟當萬應靈丹嗰陣,成個社會就會變咗一個荒誕劇。」

談到「新香港人」呢個term,秋生講咗以下呢番話,喺fb瘋傳。先講「歧視」呢個term,秋生話:「但你當你接觸到好多嘅內地人,都做一啲唔係咁好嘅嘢嘅時候,你好難講一啲頭腦唔係咁清晰嘅人,慢慢慢慢就真係會歧視。」秋生成日同內地網民開戰,佢話主要係文化差異:「唔係個個都係咁,而係文化、價值觀差距太大。好似話,你去上一個廣東話教授嘅堂,你要求人用普通話,我會覺得,你上得床嚟掀被冚:你俾得我嚟住,你就要養埋我,俾福利我。我生咗個仔,你唔同我包呀(照顧)?」

好喇,講到《人民日報》發明「新香港人」呢個term,秋生劈頭就話:「香港唔需要新香港人,香港發展需要香港人,如果需要新香港人,咁舊香港人要去邊?不如你批個地,搵解放軍隊住支槍,將啲舊香港人移晒去大西北,咁呢度咪全部新香港人囉。香港發展,只需要香港人。」至於如何定義「新香港人」?(點解個主持咁都問得出?)秋生話:「呢個要問番佢哋(《人民日報》)喇,佢哋提出呢個term 0架嘛。中國人同新中國人,即係好似England(英格蘭)同New England(新英格蘭),兩個概念嚟0架嘛!因為New England唔係England 0架嘛,即係『新香港人』唔係『香港人』嚟0架嘛?新中國人都唔係中國人嚟0架,如果以概念嚟講呀吓。」秋生又話,香港核心價值係刻苦耐勞、樂觀。秋生仲話,發明「新香港人」呢個term嘅人根本唔了解香港,因為香港唔止有內地來港嘅人,仲有印度人、中東人、混血兒、外國人,「咁嗰啲係咩人?嗰啲拉去打靶呀?」

comments