由35歲賣到78歲 曾江唔賣「美源髮采」 倒戈抽水

由35歲賣到78歲 曾江唔賣「美源髮采」 倒戈抽水

By:

星期六, 十月 5th, 2013

「乜咁煩呀?白頭髮?你又煩?搽咗啲咩呀?黃甘甘咁嘅?學我啦!梳啲美源髮采,逐漸變黑又得,立即變黑晒亦得,得咗。」呢個廣告,陪住80後成長,同「愛膚堅」、「黑旋風」一樣,都係大家嘅集體回憶。

大家經常見到呢個美源髮采廣告,陪伴大家多少個早午晚。曾江話,呢個廣告係70年代拍0架喇,計吓條數,嗰陣佢35歲,依家都78歲喇!咁多年來,「美源髮采」廣告只係後面嗰兩個「路人甲乙」唔同咗,令畫面有啲變化,但究其實,仍然都係嗰個廣告。大家細細個睇嘅版本,原來都已經播咗廿幾年喇。

嗰陣細個睇美源髮采廣告,可能會有個慨念,就係原來白頭髮可以立即變黑同慢慢變黑,原來螢幕上慣演大惡人如《誓不低頭》殺人全家卻害到鄭少秋坐冤獄的陸國榮,又或是離經叛道邪氣迫人的東邪黃藥師,竟然都有白頭髮的煩惱。大家細個嗰陣,又有冇同白髮漸生的爺爺嫲嫲講:「梳啲美源髮采,逐漸變黑又得,立即變黑晒亦得,得咗。」呢句?

(仲有網民記得,播呢個美源髮采廣告之後,係播Pigeon嬰兒用品廣告:「用Pigeon,BB開心,媽咪放心」,勁喎!依家個BB,做咗爸爸未呢?)

同一個廣告,由曾江後生播到老,但0依家,曾江都唔用美源髮采,佢用另一隻牌子喇——廣告中。早幾日已有人留意到曾江有個新嘅染髮廣告出爐喇。拍攝場景已變成哥爾夫球場,眾人打完波閒坐吹水,友人笑問曾江:「你仲係用緊嗰隻染髮呀?」一頭濃密烏髮嘅曾江就好自豪咁摸摸個頭話:「我用緊Salon de Pro染髮霜,你睇啲頭髮,自然柔順冇味健康。」最後再加多句:「Salon de Pro,你染咗未呀?」

擺明抽美源髮采嘅水喎,如果兩廣告緊接於同一時段播,都幾有趣喎。不過新廣告中眾配角的髮型就真係……同美源髮采嗰個冇分別,一樣咁娘,一樣gel到好「實」囉。

網民點睇新廣告?
「第一句擺明寸美源髮采」
「曾江用了美源髮采30多年,他終於『與時俱進』,用咗其他牌子了­。這個染髮廣告真高章,一方面踩美源髮采,另一方面用曾江講個用­品的好處,好嘢!」
「我覺得廣告一開始一個黑波代替另一個黑波去遮住個白波,意思即係­換第二隻染髮劑去染啲白頭髮。個廣告真係由頭抽到落尾。
「可惡,美源先係王道,背叛者罪該萬死」
「只要酬勞滿意,接甚麼產品廣告都得啦!曾江不過是有職業道德在演­出上滿足廣告客戶的要求講對白啫,不存在他反骨踩他上一隻代言的­產品,他有自由揀選代言的產品拍廣告。」

comments