田蕊妮不忿《巨輪》嘉欣搶鏡 上監製房拗戲

田蕊妮不忿《巨輪》嘉欣搶鏡 上監製房拗戲

By:

星期三, 九月 25th, 2013

無綫重頭劇《巨輪》噚日首播,雖然係重頭劇,但啲卡士就真係唔算強,主角陳展鵬同蕭正楠,加埋田蕊妮,最勁嗰個,就係外傳TVB諗住靠呢套谷佢做視后嘅嘉欣BB。

不過田蕊妮過咗無綫之後真係好多是非,傳得最多就係佢成日要爭戲爭做女主角,之前已經有報道話佢喺《舌尖上的公堂》同翠如BB爭戲,翠如BB由第二女主角,加戲變埋女主角,搞到佢條氣相當唔順。

今次《巨輪》都唔例外,今日有報道話田蕊妮今次係做第二女主角,戲分唔算少,但搶鏡程度就同嘉欣BB差好遠,仲話佢發現其中一集嘅劇本,佢一啲戲份都冇,嬲到立即上房搵監製王心慰理論,王心慰最後亦答應佢喺新劇《忠奸人》入面擔正做女主角。

以前阿田喺亞視係一姐,入到無綫佢就不斷做「阿二」,接《巨輪》時佢都知係做第二女主角,不過事後知道成套劇都係幫嘉欣BB做視后鋪路,就唔多高興,最終都俾佢講掂,搵到個《忠奸人》女主角做,同劇仲有商天娥同李亞男,相信都搶唔到佢鏡。

comments