無綫罰90萬 翁靜晶話:真是惡有惡報,罰得太少了!

無綫罰90萬 翁靜晶話:真是惡有惡報,罰得太少了!

By:

星期六, 九月 21st, 2013

無綫電視(TVB)藉市場支配優勢,「以相當低成本囤積藝人」,削弱對手競爭力,令觀眾損失。違反《廣播條例》,仲要罰款90萬元。原來呢個係亞視4年前嘅投訴,指無綫與藝人和歌手所簽合約部份條款和非正式政策,屬《廣播條例》中禁止的反競爭行為。估唔到亞視俾通訊事務管理局判罰一百萬之後,先至判決無綫呢單嘢。

唔少人都話,今次罰得太輕,對無綫而言90萬濕濕碎。就連翁靜晶都話罰得太輕,佢今日喺facebook轉貼咗呢則報道,寫道:「罰得太少了!這類合約,和劉家良與邵氏所簽相同,刻薄,霸道。」即時引嚟不少網民熱烈回應,有人話:「發財唔立品!」、「霸權主義」之類嘅留言。而翁靜晶就回覆大家話:「真是惡有惡報…9月23日頒發邵逸夫獎,贈他兩句佛偈:『日用常行饒益,成道非由施錢』……」之後再謂:「假如是良心企業,當年雄霸亞洲的邵氏王國,就不會曇花一現,迅間瓦解。無綫只因壟斷,才可獨霸至今,但隨着社會進步,要繼續隻手遮天,也不像舊時容易了。」

這也難怪,月前翁靜晶代亡夫劉家良師傅向邵氏追討三十年來合約訂明應有之分紅、將之注入劉師傅嘅慈善基金,幫助龍虎武師,但邵氏回覆話冇得畀錢;翁靜晶諗住打電話俾六叔老婆方逸華(六嬸)追數,但可惜六嬸都係冇回覆,令翁靜晶大為失望。

提起劉師父,噚晚係中秋佳節,人月兩圓,無奈劉師傅已離世,兩個寶貝女已返英繼續學業,故這個中秋節對翁靜晶而言,更是孤寂,所以她選擇去凌雲寺度中秋,並貼上兩張凌雲寺的相片,寫道:「沒有家人,只有出家人。三十年來第一個『單獨』的中秋。」幸而一眾網民馬上留言安慰翁靜晶,謂:「放心,有我哋面書友支持你、你不會孤獨。」為翁靜晶嘅「單獨」中秋添上一點溫暖。

comments