無綫搵張智霖拍《半沢》? 網民跪求TVB:唔好翻拍侮辱原作

無綫搵張智霖拍《半沢》? 網民跪求TVB:唔好翻拍侮辱原作

By:

星期日, 十月 6th, 2013

大件事。今日有消息指,無綫已買下《半沢直樹》版權,計劃重拍,大講銀行界明爭暗鬥,同埋打工仔被欺壓之苦,同日本原裝版一樣,但,男主角就由網民心水嘅謝天華郭晉安,變成張智霖或鄭嘉穎。

之前本報都刊登過一篇專題,模擬TVB劇集常勝方程式,「估計」如無綫開拍港版《半沢直樹》會點拍,最重要最重要都係植入銀行廣告,甚至用上一節時間以廣告雜誌形式為觀眾推介銀行服務。

本來大家都係諗住純屬吹水而已,無綫應該唔會播啩,但係文思敏捷嘅高登仔仲要加多腳,繼續幫無綫諗橋、拍港版《半沢》,就連劇名都諗好埋,如《X豐情緣》、《恆X情緣》、《借錢有情天》、《借貸追擊》、《融資風暴》、《TELLER.明白了》、《金融有情人》、《銀紙風暴之家好月圓》等等等等。

劇情包括:
1.尋親情節
半沢知道父母原來唔係自己親生父母,更震驚嘅係生父(即中野渡謙)竟然係銀行第一大董事,大和田竟然係佢同父異母兄弟。中野渡謙為盡番爸爸嘅責任,於是安排半沢升呢,同大和田平起平坐,兩人亦開始大鬥法。

2.承上文。爭產。大和田害死中野渡謙,改遺囑,吞晒成間銀行。

3.另一選擇,中野渡謙只係昏迷,醒番之後扮失憶,暗中與半沢聯手,揭破大和田陰謀。

4.大和田眾叛親離,良心發現。

5.其他元素:
a.強姦案——半沢多咗個妹,妹妹被奸人所害,慘遭強姦。
b.承上題,既然多咗個妹,自然要加插七國咁亂感情關係。
c.全部劇情轉晒做談情,可參考《衝上雲霄II》。
D.中西英治、垣內同角田可以分別再加插複雜感情及家庭倫理關係,而到最後歸根究底原來又係同半沢及大和田有關。尤其係中西英治咁靚仔,可以安排佢同半沢個妹(如有)談談情。

6.大結局係BBQ。

7.大大結局當晚,一定要喺奧海城搞個商場騷,一齊睇大結局。

當然這只是網民狂想曲。因為《衝上雲霄II》真係太成功,令一個經典劇變成一間感情關係複雜幾乎人人「都有一手」嘅航空公司故事。所以,有陰影。

老老實實,渡真利忍由張松枝來演、近藤由排長戴耀明來演,根本冇得輸。但,張松枝已灰心離開TVB,仲可以搵邊個演?此兩個重點角色,除張戴之外,不作他人選。如果冇佢哋,仲點拍?

網民心聲:
「《半沢》最好睇就係節奏明快,支線唔多同簡單。如果TVB拍實加好多感情線、三角戀,一陣分店長又鍾意咗半沢老婆呀,仲加埋咩強姦、爭家產呀咁。」
「佢一千集都好都只會得五集講銀行嘢,其他一定係爭產談情三角戀。」
「TVB翻拍絕對係對原作嘅一種侮辱」
「跪求你哋唔好翻拍!」
「最後又會變三角戀,辦公室處境劇。」

comments