港大校長非中國人係侮辱? 秋生爆粗:港督夠唔識中文啦,運作得幾好!

港大校長非中國人係侮辱? 秋生爆粗:港督夠唔識中文啦,運作得幾好!

By:

星期日, 十月 6th, 2013

香港大學新校長噚日誕生,英籍醫學教授馬斐森(Peter Mathieson)獲校務委員會通過成為第15任校長,今次亦係港大41年來,再次有外國人任校長。雖然校務會一致通過任命馬斐森,但今次任命竟然因為候任校長唔係中國人,而觸發極大爭議,未上任已遭學者圍剿,指佢「未夠班」,仲話任命非中國人是侮辱香港及中國。言下之意,即係任何要職都一定非中國人做不可?亦有消息人士指,盛傳中央政策組全職顧問高靜芝,曾屬意由華人學者出任港大校長。

圍剿馬斐森嘅學者,位位皆屬「重量級」,包括教育學院講座教授程介明、醫學院外科學系系主任盧寵茂同新聞及傳播研究中心總監陳婉瑩(陳氏仲係汕頭大學長江新聞與傳播學院創院院長)。程介明指摘馬斐森「對大學冇夢想,欠缺學術眼界,難領港大突破,擔心港大不進則退。」、盧寵茂更炮轟馬「無知、無能、無心」。至於民間聲音,佔中發起人之一陳健民就指馬斐森過於保守,真普聯召集人鄭宇碩亦暗指馬斐森不夠進取,直言身為校長有責任維持大學風骨。

網民有話兒,警句如:「如果咁叻,港大以前唔『無知、無能、無心』又識中文嘅校長就唔會帶領到港大排名連績四年下跌啦!」、「港大現在是政治大學?」、「最緊要佢能帶領港大師生,向着開放前進嘅思維進發,而唔係要就番中共,回歸到狹隘、封閉思維就得啦!」

有一位叫黃秋生嘅網民,更加忍唔住爆粗(其實佢冇幾可忍得住唔爆的)。黃秋生謂:「港大嗰個廬乜X都黐X線,話港大新校長唔識中文,家陣請漢學家咩?以前啲港督夠唔識中文啦,咪又運作得幾好?演藝學院歷來校長都唔識中文,咪又人材輩出。反觀而家個X個都講中(文),大家睇下個社會似乜X?個個講中文講到好似唔識中文咁,唔識好啲,耳根清靜。」

呢位黃姓網民,有否講出你心聲?

comments