楊婉儀開幼稚園專幫雙非童

楊婉儀開幼稚園專幫雙非童

By:

星期四, 十月 10th, 2013

楊婉儀同老公王瑞勳、女模Cara G.同老公Jesper、Jocelyn與Anthony夫婦等,噚晚喺中環出席時裝店活動,楊婉儀有開設教育中心,佢有留意雙非童來港爭幼稚園學額而排長龍撲報名表嘅新聞,佢就正著手辦兩間幼稚園舒困,佢話:「好慘!我計劃開幼稚園,小朋友有機會返學係應該,香港同內地家長為小朋友好。開幼稚園係想佢哋有教學機會,一方面係回饋社會。」家長為小朋友好係應該,但唔一定喺香港嘛。

楊婉儀同美國教育局前成員合作,辦美式國際幼稚園,問到學費同地點?佢話:「唔係國際幼稚園收費,唔係喺山頂,係大眾化去到嘅地方,另一間喺九龍區,畀搭車過關嘅小朋友。」為雙非童而設?佢話:「係!港島區畀香港小朋友,另一間幫雙非,新聞話佢哋日日過關辛苦,我同先生講寧願揸車接佢哋都無所謂,唔想小朋友返學辛苦。」其實返強國搞,會唔會仲幫到佢哋呢?

問佢係咪普通話教學?楊婉儀話:「英普,美國學校都係咁。唔擔心小朋友學唔到廣東話,睇電視,同同學、老師傾偈用廣東話,想學生競爭力強啲。」佢話會開始裝修學校,將申請教育牌,預計2014、15年喺港島區開設第一間,學額100多個,九龍區學校學額200多個。

comments