性感去酒店會周董 傅嘉莉:識咗好多年喇

性感去酒店會周董 傅嘉莉:識咗好多年喇

By:

星期五, 九月 27th, 2013

傅嘉莉噚晚都有去跑馬地馬場,出席啤酒節派對,不過就俾酥胸半露嘅莊思敏搶晒風頭。

其實傅嘉莉本人都唔弱0架,噚日有報道刊出佢同藍莓、文凱玲等去咗海逸酒店出席周杰倫演唱會慶功派對,仲話佢性感應約,搏到盡騷胸晒腿務求令周董留下印象。報道仲話,周董同佢哋唔太認識,但見咁多靚女到場,心情當堂靚晒,同有講有笑添,最後玩到凌晨先離開。

嗱,報道就話周董同班有份去P嘅女星唔多熟,但噚晚問番傅嘉莉,佢就話多年前已於台灣認識周董,當日公司同事亦有出席。咁又的確數年前傅嘉莉仲係model嗰陣,同周董拍過廣告,更藉此打響知名度。問到有冇機會成下一個J女郎?傅嘉莉話:「應該唔會,去到just say hi,我都怕惹緋聞。」哦……咁你自製緋聞話同吳卓羲嗰單又點計……呢?

傅嘉莉仲話,人生第一次飲酒係出席公司周年派對,酒量淺,飲1/3杯已醉喇。

comments