屢傳整容疑雲 劉曉慶慨嘆:跳到黃河洗不清

屢傳整容疑雲 劉曉慶慨嘆:跳到黃河洗不清

By:

星期三, 十月 2nd, 2013

由黎芷珊擔任主持嘅《最佳女主角》前晚首播,而頭兩集嘉賓就係影后級人馬,現年58歲嘅劉曉慶。

芷珊姐姐喺節目內強調劉曉慶係一個「傳奇人物」,咁確實曉慶姐又真係幾傳奇,佢喺訪問中詳談人生高峰及低潮。曉慶姐做過影后﹑亦因逃稅而做過階下囚﹑出獄後從商做生意,成為億萬富婆,今年再婚下嫁王曉玉,婚後幸福快樂。

當然,曉慶姐最為人津津樂道﹑嘖嘖稱奇嘅,係年屆58歲嘅佢,肌膚滑不溜手,駐顏有術,喺訪問中佢個樣仲好似「後生」過芷珊姐姐,咁當然就惹嚟整容疑雲。

對於屢傳整容,曉慶姐亦大方回應,佢喺訪問中重申:「我沒有整過容﹗」佢仲笑言經常被傳整容,真係「跳到黃河洗不清」,佢話要分清楚「整容」同「美容」,整容係眼睛開刀﹑整高個鼻,或者係下巴同個嘴動手腳等;美容就係靠修復及保養等,但曉慶姐強調冇喺五官任何一個地方動過手腳。雖然否認整容,但佢唔反對人家整容,因為呢啲係人家權利及自由,不過佢認為整容始終唔係萬能。

問到曉慶姐怕唔怕老?佢話:「我不喜歡老,但沒辦法,每人都會老,我希望老得慢一點:每人都會死,我希望死得晚一點。」

曉慶姐又話現時階段人生已算無憾,仲話會無為而治:「在不傷害他人前提下,做自己想做的事。」佢又話婚後老公畀佢好大自由度,鍾意嘅嘢就去接嚟做,會盡量選擇自己鍾意嘅事情嚟做。

芷珊姐姐最後問佢有乜嘢小秘密,曉慶姐自爆鍾意打機,尤其係鍾意打「保衛蘿蔔」,有時會打到凌晨三﹑四點先捨得瞓。

曉慶姐又幾好嘢喎,打機打到咁夜,皮膚依然保養得宜,真係令人艷羨呀﹗

comments