容祖兒想念同師兄蜜遊洛杉磯日子

容祖兒想念同師兄蜜遊洛杉磯日子

By:

星期一, 九月 16th, 2013

品味衣著都會流露出心情想法,容祖兒今日就戴住一頂寫上「HOLLYWOOD」字樣兼有兩個人仔頭飾,現身屯門為新碟舉行簽名會,離遠睇個頭飾,感覺就好似一對情侶拍拖去荷李活旅行咁,當近睇先知原來係兩個女仔公仔,祖兒早前同男友劉浩龍(師兄)去洛杉磯外遊,佢承認仲回味旅行時光,祖兒甜絲絲話:「好掛住嗰邊好似渡假咁嘅生活,同香港完全唔同,係放假好地方,以前東京不停買,搞到自己好忙,喺LA每日只得一件事。」

講到嗰件事係咪拍拖同有人接送時,佢笑晒口話:「冇人跟就最開心。」祖兒話同師兄係洛杉磯都係做一般生活嘅嘢,佢講笑話喺香港係乜都做唔到。

中秋佳節,原定夜晚嘅工作臨時取消,而之前又提早同咗家人食飯慶祝,豈不是可以同師兄拍拖撐枱腳?佢話:「佢唔喺香港,自己搵朋友食飯。」祖兒話覺得開心就得,唔需要大時大節規定一齊過。

另外,祖兒年底開個唱,而個唱事宜努力進行中,佢希望跟公司申請一兩日時間,同黃偉文飛往英國再添歌衫,問到男友會否同行?佢話:「又去?我未知,暫時我自己希望有時間同公司傾,到時先知,可以畀我去就開心。」佢強調並非偷懶,而真係想買靚衫同觀眾分享。

此外,祖兒想搵張家輝健身教揀操弗,當建議不如由師兄操弗上台任特別嘉賓時,佢話:「佢係咪應該開演唱會多過我呢?成日講佢,其實我0依家係谷緊我啲飛嘅,希望大家注意力放我度,啲好朋友嚟唔嚟睇,我都覺得冇所謂,呢幾個月都集中演唱會嘅嘢,咁完咗演唱會『呼、呼』再算。」祖兒透露演唱會後計劃再去旅行,但會跟上次一樣同幕後同事一齊去。

comments