商台女員工又爆料 《任我行》陳奕迅拎叱咤至尊金曲?

商台女員工又爆料 《任我行》陳奕迅拎叱咤至尊金曲?

By:

星期六, 十月 5th, 2013


商台女員工爆料,話2013年叱咤樂壇頒獎禮會係Eason拎至尊金曲同男歌手金獎,周柏豪拎男歌手銀獎,祖兒係女歌手金獎。


G.E.M.點解冇份?不解釋

每年臨近年尾,高登都會出po,話有商台女員工爆叱咤樂壇頒獎禮得獎名單,都係嗰句啦,你永遠唔會知呢個「商台女員工」係邊個。上年11月先至流出呢個po,估唔到今年竟然「提早」到今日就出po,仍然係由高登瓊姐貼文。0依家先係十月,有冇咁早有得獎名單呀?

綜觀上年度呢位商台女員工報嘅料,同正式得獎名單相差都幾遠下,例如名單上話《留白》仲拎埋叱咤樂壇至尊歌曲大獎,但結果係陳奕迅隻《重口味》得獎;叱咤樂壇女歌手話係王菀之攞金,容祖兒攞銀,銅獎係吳雨霏,但正式賽果依次為祖兒、薛凱琪同吳雨霏。似乎呢位「商台女員工」嘅料,唔係好準喎。

又睇吓「商台女員工」爆今年叱咤得獎名單係咩先:(信不信由你)

叱咤樂壇男歌手
金獎:陳奕迅
銀獎:周柏豪
銅獎:許志安

叱咤樂壇女歌手
金獎:容祖兒
銀獎:王菀之
銅獎:吳雨霏

叱咤樂壇組合
金獎:C All-star
銀獎:Supper Moment
銅獎:Yellow

叱咤樂壇至尊唱片大獎:《小日子》容祖兒

專業推介叱咤十大
1 (至尊歌曲) 《任我行》陳奕迅
2 《小日子》容祖兒
3 《情人甲》許志安
4 《青春頌》 許廷鏗
5 《我的宣言》周柏豪
6 《逗陣兄弟》 陶喆
7 《說一句》連詩雅
8 《囂張》盧凱彤
9 《世界劇團》 馮允謙
10《一千零一次人生》 林欣彤

有網民即留言話:「天后G.E.M.呢?」呢樣嘢仲使問嘅?正如何韻詩一樣係捧蛋啦,不過,名單內阿詩就打入「我最喜愛的女歌手」五甲,其餘四強分別係容祖兒、王苑之、楊千嬅同吳雨霏。

亦有人問:「Fiona呢?」係喎,冇薛凱琪嘅?更離奇係周柏豪竟然拎男歌手銀獎,安仔拎銅獎……咁張敬軒同愛將方大同呢?

仲有個謝安琪,一樣影都冇。陰功豬豬。不過呢張所謂「商台女員工大爆《2013年叱咤樂壇頒獎禮》得獎名單」,都係笑吓算喇。

comments