周杰倫酒店開Party 藍莓傅嘉莉性感應約

周杰倫酒店開Party 藍莓傅嘉莉性感應約

By:

星期三, 九月 25th, 2013

周杰倫日前喺香港舉行九場個唱,順道過中秋節,雖然遇上颱風「天兔」襲港,幸好個唱總算順利完成。

今日有報道話今次周董開騷,緋聞女友昆凌冇跟住嚟,周董就喺迎月夜當晚,喺酒店總統套房開P,而有份(定有幸?)出席嘅靚女,除咗有周董親自邀請外,其他都係身邊好友為佢安排,當中包括派對「常客」藍莓劉俐﹑拍緊《喜愛夜蒲3》嘅文凱玲﹑房祖名前緋聞女友蘇子賢,同埋「咖啡妹」傅嘉莉等,至於周董好友余文樂亦都有出席。

報道話藍莓﹑傅嘉莉及文凱玲等人,都搏到盡以性感打扮示人,騷胸晒腿出席派對,務求令周董留下印象。據悉當晚周董安排多款美食招呼來賓,包括鮑魚﹑龍蝦﹑靚牛扒及上等紅酒等,雖然同佢哋唔太認識,但周董見咁多靚女到場,心情當堂靚晒,同佢哋有講有笑添。

報道又講雖然班靚女喺派對又食又玩,但就照嚴格遵守「禁合照」規則,所有靚女要求同周董合照,都被婉拒,小心駛得萬年船嘛,一陣畀人唔覺意/唔小心放上微博及facebook,又可能被大造文章。雖然冇得向周董集郵,但佢哋當晚玩得都好高興,最後玩到凌晨先離開。

comments