卿卿唔後悔拍三級片

卿卿唔後悔拍三級片

By:

星期三, 十月 16th, 2013


今集《最佳女主角》係葉玉卿,當然有講佢以前拍三級片嘅經歷。佢話參選亞姐係當暑期工,又話以前讀天主教學校好嚴,有人搵人去選美,咁佢就去咗選亞姐,就入咗行。

卿卿第一日開工係做女主角拍《群芳頌》,不過佢話電視模式都好似工廠咁流水作業,做咗6年之後,覺得冇發圍,於是想入電影圈。

當時有周刊搵佢拍性感封面,佢就覺得要做就要做得徹底,佢亦唔係第一個性感:「我當時唔覺得性感,只係頗暴露,係一個暴露嘅Gimmick」有雜誌搵佢影性感相,佢直覺就話:「好呀,其實我冇乜嘢planning嘅,好多時都係憑自己嘅直覺,因為當時我喺電影做咗好多年,又冇咩出色啦,做咗五六年都做唔到啲咩出嚟,當時又覺得自己識做啲戲。電視同電影圈係天同地。拍咗雜誌封面之後就好多人搵。」

佢又話:「返轉頭我會唔會去做呢?我可能唔會去做。但係我有冇後悔去做呢,我冇後悔去做。」

卿卿拍完三級片之後,都受過好多壓力,講到屋企人,佢話:「從來冇反對過,我媽咪好信我,無論點我都愛佢。….(開始眼紅紅)因為講到呢一刻,我媽媽已經去咗」然後佢話:「我唔會做一啲嘢去令我媽媽羞恥嘅,我媽咪咁耐淨係打過一次電話比我,當時佢話,『今日我睇到你本書呀,好多人買呀,特別係多男人』,佢又冇語氣嘅,我媽咪係一個絕頂好人,未做過嘢,完全冇社會經驗嘅人,呢個唯一…你話我一生人嘅遺憾,可能當時佢會有啲難受。但我只係同媽媽講,我知我做緊乜o架。」

講到卿卿老公家人有冇介意佢背景,佢就好似之前報道咁講,有人拎過佢拍嘅三級片俾佢奶奶睇,但卿卿話佢拍過30套戲,只係拍過3套三級片,唔明點解只係拎三級片俾佢睇,不過呢個時期已經過咗,依家佢同奶奶關係已經變好咗啦。

comments