何韻詩提鄧九雲又嗌驚: 棄權,唔回應﹗

何韻詩提鄧九雲又嗌驚: 棄權,唔回應﹗

By:

星期二, 十月 22nd, 2013

何韻詩(阿詩)噚晚喺紅館舉行尾場演唱會,佢兩度「安哥」,到晚上11點35分,阿詩身穿全新歌衫﹑腳踏8吋高踭鞋上台,獻唱師傅梅艷芳嘅《似是故人來》,現場燈光刻意較暗,等阿詩好好演繹歌曲懷念師傅。不過其間發生小插曲,事緣阿詩欲步行到升降台離開時,因升降台提早降下,搞到阿詩差啲踏空險跌落台,幸而佢眼明手快即時煞掣,但全場粉絲已嘩聲四起。

最終個唱於11點45分完場,但歌迷卻依然不肯離開,最後擾攘15分鐘,粉絲見工作人員出來拆音響才肯乖乖離場。

事後阿詩出席慶功時,一坐低就被問到險跌落台嘅驚險情況,佢返後台時Wyman都即時話:「好彩有阿姐(梅艷芳)睇住。」阿詩直言當時情況步步為營。

對於緋聞女友鄧九雲睇到喊,阿詩就話:「係咩?咁咪好,大家抒發吓,谷住眼淚唔好。」

記者指佢話對方做家人時,阿詩又立即表示話大家捉字虱,又打趣表示已有老公,不過記者繼續追問鄧九雲係咪同老公一樣重要,佢話:「咁都扯過去,棄權,唔回應。」當聽到記者講「九雲BB」,阿詩反應甚大話:「好驚,又下一題。」

此外,早前阿梅遺物被公開拍賣,問到阿詩係咪有購回師傅遺物?佢話:「對我嚟講嗰啲係身外物,佢留落嚟唔係嗰啲,係佢精神、個性同仗義,自己唔係太大感覺,唔係好可惜,最重要記住咗,拍賣咗佢嘅嘢都係喜愛、愛同掛念佢嘅人,畀佢哋收藏物品係保存佢啲嘢嘅好方法。嗰啲獎項係獎項,依家記起梅艷芳唔係佢邊年攞咩獎,係記住佢,我對物質唔係太大追求,唔好將物質放得咁重要位置。」

comments