三子之母梁洛施 原來係老煙槍?

三子之母梁洛施 原來係老煙槍?

By:

星期三, 九月 25th, 2013

梁洛施復出拍戲,拍攝張艾嘉新片《念念》,依家喺台灣趕拍中,日前(21號),張艾嘉率領梁洛施、張孝全等,繼續於民族東路一間拳館,繼續趕拍。

之前有報道話,李澤楷暗中教路,教梁洛施扮樸素文藝女生,一身行頭一千蚊有找,蒲誠品再手抽一大袋走人,清純形象,令人頓忘佢係三子之母。加上有傳梁洛施同張艾嘉兒子Oscar拍拖,張艾嘉係大導演,囝囝亦是優良出品,梁洛施同佢拍拖,亦連帶登時被加分。

之但係,奇景,出現了,發生在台灣。當日大夥兒於拳館拍攝,正值天兔威脅,不用埋位時,最好就係吹水,或者,食番支煙叉叉電。而當日,張艾嘉煙癮發作,吞雲吐霧好正常。但估唔到,原來梁洛施都係鍾意食煙之人。

今日台灣《壹週刊》報道,當晚梁洛施悶極無聊,於是走咗出去,同工作人員吹水,期間突然煙癮發作,當街扯煙,而且手勢純熟,唔似係初哥。有工作人員話,見到外表「清純而文藝」嘅梁洛施突然點煙,同張艾嘉、張孝全等齊齊煲煙,都大感意外。

工作人員爆料謂,佢哋見過梁洛施開工嗰陣,陪導演張艾嘉一齊食煙,而且「看來應該是老菸槍」,仲話:「她愛抽的程度,張姐(張艾嘉)也出言要她節制。」又真係估唔到喎。

報道仲話,梁洛施依家奉行阿媽政策,就係請自己阿媽——梁慧娟去台灣,表面上就係照顧梁洛施,實則就係同張艾嘉吹水博加分。一個陪抽(煙)一個陪傾,又真係幾高招喎。

comments