【Running Man】李光洙現身 過千粉絲迫爆尖嘴

【Running Man】李光洙現身 過千粉絲迫爆尖嘴

By:

星期六, 十一月 16th, 2013

「長頸鹿」出沒注意呀!因為「長頸鹿」出現,搞到尖沙嘴海防道塞咗近千人,不停有人尖叫,大叫「光豬」,大家唔好誤會係「光豬六壯士」,而係韓國綜藝節目《Running Man》主持,有「長頸鹿」花名嘅李光洙殺到,佢同汪圓圓,圓圓個表妹湛琪清、吳嘉龍等出席天梭表開幕活動。

楊洛婷做大會司儀,當佢喺一大班fans面前大嗌:「第一位星級嘉賓出場。」但行出嚟嘅係汪圓圓,面前幾百人即刻好齊心噓爆,楊洛婷真係靠害。終於等到光洙出現,fans爆嗌勁high,佢好識做用廣東話自我介紹,同大家打招呼,又做舉手招牌動作,間中有騷下V字手勢、扮cute表情。

剪完綵之後,李光洙要返半島酒店先肯做訪問,現場公關話係警察怕混亂,要求佢哋咁做喎。李光洙受訪,問番佢話汪圓圓畀佢fans勁噓,佢個樣好尷尬:「聽唔到有人噓,之前聽到話對方就結婚,原本準備咗賀詞,不過喺現場好忙亂,搞到唔記得咗。」

做完個活動,下午佢就返韓國,佢趁噚日有時間,喺尖沙嘴行街、食中菜,飲咗杯啤酒,佢話炒飯同點心好好味。有指佢係《Running Man》入面酬勞最高一位, 李光洙就唔肯講自己幾高身價,只係叫大家唔好咁諗,fans都係因為個節目至識佢。Fans最想知道冇拍拖嘅光洙,鍾意咩類型女仔,佢話:「我鍾意有笑容嘅女仔。」

comments