【發牌夢碎】回頭無路 無綫「二世祖」張松枝 陷經濟困難

【發牌夢碎】回頭無路 無綫「二世祖」張松枝 陷經濟困難

By:

星期六, 十月 19th, 2013


香港電視不獲政府發牌,眾藝人頓感前路茫茫,而且多個劇集包括《天網》、《大眾情性》及綜藝節目《爆Talk》已決定停拍,惟陳穎妍及林文龍主演、接近煞科嘅《Night Shift》仍繼續開工。大家都將焦點放喺林文龍、黃日華、蒙嘉慧、艾威等藝人,其實仍有一群喺無綫默默耕耘十幾年嘅甘草綠葉,當日為了更好的生活及更佳發展而轉投王維基旗下。喺無綫得不到的尊重、滿足不了的戲癮,甚至更好的收入,喺香港電視都得到了,但如今,前路又應該點行落去?

其中一個,係張松枝。一時記不起張松枝是誰?就係被網民一致公認、同日劇《半澤直樹》、堺雅人戰友渡真利忍一模一樣嗰個。另一戰友近藤,就同另一綠葉王——戴耀明激似。

張松枝同戴耀明,都係好戲之人,前者專演惡少二世祖,擅長欺壓戴耀明最拿手演出嘅小人物角色。一凹一凸,啱啱好,但如今張松枝已離開工作咗18年嘅無綫、去香港電視闖天下;戴耀明仍然喺無綫,《愛,回家》都見到佢。

去年6月,張松枝決心離開TVB,當時佢喺微博寫道:「後會有期TVB,希望日後還有機會再會作。」有網民話佢充滿怨憤,張松枝當時回應謂:「我在TVB工作18年了,難道要離開就不能留感情嗎?做人為何要有那麼多怨氣?」王維基以超過一倍人工、禮聘張松枝過檔。當時,張松枝話自己喺無綫已經12年冇加人工:「好彩keep住有工開,唔使用錢,食公司飯盒慳唔少。」但角色千篇一律,又被迫接受臨時演員角色,越做越覺得自己冇價值,加上王維基誠意厚,故毅然離巢,放手一博。

正如王維基所講,好多加入香港電視嘅員工,都有家庭負擔。張松枝亦不例外。拍過《三面形醫》同《警界線》,8月仲為新劇《夜更》試造型,忽然,夢想在「一男子」理由下破滅。

張松枝直認,如今有經濟困難,佢接受本報訪問時直言:「睇唔到前景,因為政府指引冇話要製作劇集。如果將來有機會返TVB都想接部頭,但自己又冇咁資格。」

今日有報道謂,張松枝面臨失業,又有家庭負擔,每日惟有慳住使。百般無奈,又無出路,讀過機械工程的張松枝,表示想轉行從事建築,更謂「多謝政府」,俾機會佢要去申請公屋。至於北上發展,張松枝有諗過,但機會……他自己也心中有數。

張松枝謂,同香港電視仲有八個月合約,依家,唔想諗前景,亦都諗唔到前景。曾鬧爆無綫嘅艾威就話有無綫高層約食飯,暗示有機會回巢,咁張松枝的命運又如何?同樣,於今年3月約滿港視的甘草演員彭國樑(你見到佢個樣一定認得)亦不獲續約,無綫話好welcome舊員工,但都冇人搵佢。

是誰一手摧毀了他們的夢想和家庭?

comments