【幕後爆料】 「姣Wing」黃心穎逢仔冧 1,200萬買豪宅

【幕後爆料】 「姣Wing」黃心穎逢仔冧 1,200萬買豪宅

By:

星期二, 十月 1st, 2013

返嚟喇返嚟喇,日前代表香港參選世界小姐嘅黃心穎BB,噚晚終於返到香港喇。一眾fans已齊集機場,等BB由印尼空運到港,更送上小禮物,逗得心穎BB好開心。雖然十強不入,不過對fans而言,心穎BB已經超額完成喇,更開心係見到BB容光煥發嘅樣,證明BB幾攰都好,戰鬥力依然強勁!

不過,今日有報道就話,心穎BB去年選港姐嗰陣,已經被爆專媾富二代,爛蒲又食煙,更有指佢帶頭搞是非,聯同其他佳麗一齊杯葛大熱人馬朱千雪同湯洛雯等。睇番資料,選港姐嗰陣,已經有報道話張名雅同黃心穎面和心不和,是非一籮籮。

何以當選後變成大家嘅BB呢?報道話,當選之後,心穎BB有殺錯冇放過周圍放電,成功冧掂無綫某男管理高層,唔止官方刊物收到order要搵BB做專訪,仲要大篇幅報道,而且《東張西望》同收費台都要大造BB,重點報道。

該知情人士話,大家都聽到心穎BB有高層「關照」,更有指BB仲會去嗲啲監製博多啲job,就連對住班工作人員,心穎BB都係嬌聲嗲氣,大家私底下都叫佢「姣Wing」喎。

咁都未止呀,心穎BB更被爆上月突然斥資千二萬,購入豪宅、油塘Ocean One高層800呎單位,面對無敵海景。由大圍名城豪宅再搬去另一豪宅。究竟BB係吸金力強勁,定係後台強勁呢?

你有你講,心穎BB都話之你,晚上近9點,BB喺網上貼靚靚新圖,展示fans送俾佢嘅獎座,並寫道:「一份好窩心嘅禮物!我喺呢個月嘅旅程最大嘅得著係感受到原來背後有咁多人支持我。雖然選嘅時候自信心不斷受到挑戰,但最後都學到怎樣調節心情,亦對自己的表現幾滿意,可以話沒有一絲的遺憾。今日已經從新投入工作,好開心呀!」

comments