「14巴港女」潛水唔返工 邵子風抽水話造假

「14巴港女」潛水唔返工 邵子風抽水話造假

By:

星期三, 十月 9th, 2013

早幾日網上一條港女怒摑男友14巴短片,極速喺網上瘋傳,仲上晒報章港聞版,短片入面呢對癡男怨女更雙雙被起底,男方被揭喺FB自爆原來唔係第一次被女方打,不過兩人一時又糖癡豆,一時又水溝油,有人爆料話佢哋當街當巷「扭打」都唔係第一次,連當日有人報警,到場警員都話:「上次你哋已經係第16次喇喎!」不過「14巴港女」今個月18號都要到九龍城警署報到。

今日有報道話「14巴港女」原來任職土瓜灣一連鎖個人護理店售貨員,叫「娜姐」,而當日佢掌摑男友嘅地點就正正係對正佢返工嘅地點!有記者噚日就去到該分店等「14巴港女」返工,不過佢就成日都冇見人,記者入鋪查詢,員工就非常警戒,叫經理擋駕,又話「娜姐」當日放假。

而龍小菌經理人邵子風就乘機抽下水,喺FB話:「表揚片中三個演員的演技,如有機會認識該女朋友,我一定會請佢參加我影片拍攝!」不過佢呢段留言引起罵戰,已經刪除咗,邵子風事後話係想反思下香港點解咁鍾意睇人衰喎!講到尾,都係抽水啫!

comments