《May姐有請》收視勁升4點 哈哈哈哈哈哈哈﹗

《May姐有請》收視勁升4點 哈哈哈哈哈哈哈﹗

By:

星期二, 十月 22nd, 2013


噚日雖然有12萬名市民上街遊行,抗議政府黑箱作業,仲要求政府要公開及交代香港電視不獲發免牌牌照死因,而噚晚政總集會現場播放無綫《May姐有請》節目,全場遊行人士齊心高呼「轉台」。

你有你高呼「轉台」,無綫噚晚就繼續播被電視迷「頂唔順」﹑「無聊冇新意」嘅《May姐有請》及《超級無敵獎門人 終極篇》。

有網民會以為,無綫會抽起唔播噚晚嗰集《May姐有請》避風頭,又或者May姐喺節目內會「哈」少幾聲,或者落少啲雞汁──當然呢啲都係一廂情願。噚晚嗰集May姐繼續係乜餸都落雞汁,仲要大大支咁影住,然後佢仍然繼續:哈哈哈哈哈哈哈哈哈哈哈哈哈哈……

咁May姐呢個「哈哈功」有冇「哈」走啲收視呢?Sorry﹗冇啵﹗

可能呢排啲人不停講《May姐有請》,大家邊睇邊鬧,想「見證」May姐點落雞汁,同埋佢喺一集內可以「哈」幾多聲,竟反高潮刺激收視勁升4點(約26萬觀眾),噚晚嗰集錄到22點收視(約141萬觀眾);而本月27日就係《May姐有請》最後一集,之後就播另一個飲食節目,由黃淑儀主持的《吾淑吾食》喇。

另外,緊接May姐的《超》嘅收視同樣冇受影響,你鬧佢冇新意嘛﹑遊戲無聊嘛﹑或者浪費食物都好,收視依然係升嘅,同樣係升咗4點,有成27點收視(約173萬觀眾)。

至於由視帝陳豪及黎耀祥聯手演出嘅《法外風雲》上周首播,平均收視錄得26點收視(約167萬觀眾),比之前一個星期同時段微跌一點,成績一般。反而《巨輪》及《愛‧回家》收視就微升。

comments